DASS Kulcha

لاہو ر کا انوکھا اور روایتی ناشتہ 

داس کلچہ 

تحریر و تحقیق ؛۔ سید فیضان عباس

لاہور زندہ دلوں کا شہر ہے جہاں دن کے ساتھ راتیں بھی جاگتیں ہیں۔خاص طور پر اندرون لاہور کی تو رونق ہی شام سے شروع ہوتی ہے ۔جہاں کھانے پینے کی دکانیں سج جاتی ہیں جو کہ رات دیر گئے صبح تک کھلی رہتی ہیں ۔کھلے دل کے لاہوری دل بھر کے کھاتے پیتے نظر آتے ہیں۔لیکن لاہور تو خاص طور پر ناشتوں کی وجہ سے مشہور ہے ۔لاہور کے اہم ناشتوں میں بونگ پائے ، نان چنے ، نہاری ، کوزی حلیم ،سری کا سالن،مغز نلی کا سالن اور داس کلچہ شامل ہے ۔اندرون لاہور کی اس خاص ناشتے کی ڈش کے بارے میں شہر کے باہر رہنے والے لوگ توبہت ہی کم جانتے ہونگے ۔اگر ان کے سامنے یہ داس کلچہ رکھ دیا جائے تو انکی حیرانی کی حد نہیں ہوگی کہ یہ کیسی ڈش ہے ؟ اور کیسے کھانی ہے ؟

داس کلچہ اندرون لاہور میں ایک ثقافتی کھانہ ہے جو کہ زیادہ تر ناشتے میں کھایا جاتا ہے ۔ لیکن عمو ما دوپہر تک کھانے میں ملتا ہے ۔داس کلچے کے کلچے دیکھنے میں عام کلچے کی مانند ہی تندور میں تیار ہوتے ہیں ۔لیکن ان کا سائز قدرے چھوٹا ہوتا ہے اور یہ ذرا موٹے ہوتے تھے ۔یہ میدے کے خمیر سے تیار کئے جاتے ہیں۔تیار ہو جانے کے بعد یہ شوارما بریڈ کی مانند نظر آتے ہیں۔اسکے ساتھ کھانے کے لئے چٹ پٹے قسم کے چنے بنائے ہوتے ہیں جو کہ چکڑ چنے کی طرز پر تیار کئے جاتے ہیں ۔جبکہ ان چنوں کے ساتھ پکوڑوں کی طرح کی چند پکوڑیاں جسے لونچھڑے کہا جاتا ہے جس کا سائز بڑی پکوڑی جتنا ہوتاہے ۔ اسکے ساتھ انار دانہ کی چٹنی ، اچار اور ساتھ باریک باریک سلاد دیا جاتا ہے ۔جو کہ اسکی لذت دوبالا کر دیتا ہے ۔لوگوں کو کھاتا دیکھ کر منہ میں پانی آجاتا ہے ۔ممکن ہے کہ پہلی مرتبہ کھانے میں کچھ دقت ہو کیونکہ کلچہ ذرا خشک ہوتا ہے ۔اور چنے وغیرہ بھی قدرے خشک لیکن بعد ازاں آپ کو یقیناًاچھے لگیں گے۔داس کلچے کے بارے میں اندرون لاہور کے کچھ پرانے بزرگ بتاتے ہیں کہ یہ کھانہ امرتسر سے آئے ایک خاندان نے تقسیم سے پہلے شروع کیا تھا ۔کچھ عرصہ پہلے تک صرف موچی دروازہ کے علاقہ چوہٹہ مفتی باقر میں ہی بنائے جاتے تھے بعد ازاں اس خاندان کی آنے والی نسلوں میں منتقل ہو ا اور اب کاروباری سطح پر چونا منڈی چوک ،کشمیری بازار اور دیگر جگہوں پر بھی فرو خت ہونے لگا ہے ۔اور اب تو لاہور کے بڑے بازاروں رنگ محل ،ڈبی بازار ، اعظم کلاتھ مارکیٹ ،موتی بازار ،اور دیگر تجارتی جگہوں میں کھانچہ اٹھائے بھی بیچتے نظر آئیں گیں۔آپ جب بھی لاہور میں آئیں ایک بار ضرور داس کلچہ ضرور کھائیں۔اندرون لاہور میں والڈ سٹی آف لاہور اتھارٹی کی کوششوں سے لوکل ٹورازم میں خاصا اضافہ ہوا ہے ۔جس کے باعث تاریخی عمارات کے ساتھ ساتھ ایسے روایتی کھانوں کو بھی بقا بخشنے کے لئے مناسب انتظام کیا جا رہا ہے ۔داس کلچہ بیچنے والوں کی سرپرستی اور انھیں اسکو بیچنے کے لئے مناسب مواقعے فراہم کرنا بھی شامل ہے ۔اس کے علاوہ لاہور کے باقی روایتی پکوانوں پر الگ سے فیچر شائع کیا جائے گا ۔